“Udeskole” an Dänemark, “Uteskole” an Norwegen, “Outdoor Learning” a Schottland, “Draußenschule” an Däitschland, Éisträich an der Schwäiz, la “Classe dehors” a Frankräich, l’”Ecole dehors” an der Belsch, “Apprendre au-delà des murs” am Kanada, … A ville Länner gëtt probéiert, d’Schoul ëmmer méi mam Liewen dobaussen ze verknäppen an d’Schoul och mol aus dem Schoulgebai erauszeféieren - an ëmmer méi Klasse probéieren dat och zu Lëtzebuerg. Op der Homepage vun der Stëftung Silviva fannt Dir vill interessant Inspiratiounen an all d’Virdeeler vum dobaussen léieren.
Scho fir di zweete Kéier invitéiere mer Iech heimat ganz häerzlech, bei eise Mir-si-raus-Woche matzemaachen. D’Mir-si-raus-Wochen hunn als Zil, de Schoulen an de Kanner Loscht ze maachen, eng Rei Léieraktivitéiten, déi un de Plan d’études gebonne sinn, no baussen ze verleeën. Iddien a Virbereedungen dozou kritt Dir ganz praktesch och hei um Site presentéiert.
D’Aktivitéite sin aus enger Zesummenaarbecht tëschent der Plattform “Kanner virun d’Dier” an dem SCRIPT entstan.
Och déi Kéier kann all Klass, déi bäi de Mir-si-raus-Woche matmécht, an deenen anere weist, wat se gemaach huet en flotte Cadeau kréien. Schéckt eis dofir einfach eng Mail mat enger Foto an enger kuerzer Beschreiwung vun Ärer schoulescher Aktivitéit, di net tëscht de Mauere vun Ärem Schoulgebai stattfonnt huet, op mirsiraus@men.lu. Als Merci fir déi gutt Iddie ginn et fir d’Klass en puer suergfälteg an altersgerecht ausgesichte Bicher iwwert d’Liewen dobaussen. En puer vun den Aktivitéiten, déi mir d’lescht Joer erageschéckt kritt hunn, fannt Dir an der Rubrik “Inspiratiounen”.
Fir weider Informatiounen ze kréien, kënnt Dir eis gär op mirsiraus@men.lu kontaktéieren.
